Aıtys — aýyz ádebıetinde ejelden qalyptasqan poezıalyq janr, top aldynda qolma-qol sýyryp salyp aıtylatyn sóz saıysy, jyr jarysy.Aıtys — sınkrettik janr, ol turmys-salt jyrlarynan bastaý alyp, kele-kele aqyndar aıtysyna ulasqan. Aıtysta osyǵan oraı lırıkalyq, epıkalyq, dramalyq sıpattar mol ushyrasady. Sol arqyly bul janr aýyz ádebıetiniń ózge túrlerimen qanattasa damyp, bir-birine eleýli áser-yqpal jasap otyrǵan. Batyr jáne lıro-epos jyrlaryna da áserin tıgizip, ózi de arnasy keń mol salaǵa aınalǵan.